سفیر الحب

سالوفه و ربّاط

إبشعر    و أحچیهه   إلکم   عندی سالوفه

عند   أهل    إلفکر       بإلدّنیا      معروفه

ملک  راکب  إحصانه   إو   فات  بیه للصید

خدامه      معاه        یتگنّصون       إبعید

بإلرجعه   إو    نزل     یسئل    إو  مرّاهم

عمیان        إبدرب       شیّاب      شافاهم

نزل   من    إلحصان   إو     سلّم    إعلیهم

کشف      مضمونهم      بتراب      رجلیهم

فقارا    إثیابهم      مشگوگه    و   إیعانون

لا   زاد   إو    أکل    لا   مای   و إیشربون

ما       عدهم    أهل     عمیان      یفترّون

علی   إلبیهم   رحم   بإلصوت    و إیبارون

گال   إلملک    گوموا    أنا      إلکم    عون

أسکّنکم   و      أوکّلکم   و     أنا  إلممنون

رکّبهم    علی     إحصان    إو     سرا بیهم

صوب     إلقصر    متعنّی     إو    یباریهم

نزّلهم      غسلهم       لبساهم         ثوب

دخّلهم    إلقصره    إو     سوّه     إلمطلوب

حطّاهم     إبغرفه    إو      ظل    یباریهم

لحظه    إبلحظه    یذکرهم    یمر    بیهم

یوکّلهم     یغسّلهم         مع        إلخدّام

ظل    إبهل    عمل    دایم   شبه   محتام

شافاهم    إضعاف    إو      راد   یشفیهم

جاب    إلهم     تمر       بإلزاد     یرضیهم

لأجل    یرعی    إلنظافه     ظل   یوصّیهم

إجمعوا   إلفصم    یابه   لا   یضر    بیهم

إلفصم   حطّوه    إبکتر      إلدار   یتجمّع

تجی   إلخدّام   و   إتلمّه   إو عفا إلیشبع

کلو   یا   ما   کلوا     بإلتمر    بیه     إیّام

إعتصبوا   ضد   ملکنه   إو طردوا إلخدّام

مر   بیهم   إو    گال    إلسبب   یا عمیان

لیش    إلزاد    گطعیتوه    عن    إلجوعان

گالوا   حصّه    إنرید      إلفصم     حگنه

ربع    إلنه    إلنجمعه   و   إلحکم   ربنه

گال   إلهم    قبول    إلکم   ربع    معزول

من   غیر   إلفصم   طلبوا   و   أنا إلمسئول

قبلوا    و   أعزلوا   من     إلفصم    چومه

واحدهم       یچردس    چیسه     بهدومه

بعد   إسبوع     لاعوا   صاحوا      إلعمیان

ربع    ناگص   علینه    إلفصم   یا بو إفلان

نرید    إلنص    تجسمه     إویانه    یومیّه

نص    إمن    إلفصم    حگنه      إبجوانیّه

قبل    بیهه      إلملک     داوم     یداویهم

إطاهم   نصهم    إلحگ   و  إبتله بیهم

بعد   إیّام   شدّوا     غیضهم       بإللیل

یردون   إلفصم   کلّه    إلدموع   إتسیل

مر   بیهم   لگاهم    سوده     گعدتهم

نشدهم   شنهی    إلأحباب     غیضتهم

گالوله    نرید     إلفصم    کلّه      إلنه

و إعلی    إلفصم   ما   واحد    یطالبنه

گلهم    للنظافه    إلکم     إو      لمّیته

إلخدم   جمعوه    بإلبر    تونی   ذبّیته

أخاف   ألنمل    یلتم    یفتر    إحذاکم

و إلذبّان   یحرگ     سلفه      سلفاکم

بعد   کافی   حچی   تتعزّزون   إحذای

إلبسوا   إثیابکم   و إهناک  عندی رأی

خذاهم   ذبهم   إبدرب   إلإجوا    منّه

إبدرب   عاصی    گطفهم   ما   ألومنّه

لأن    ما   قدّروا   واحد     یساعدهم

طمعوا   بإلفصم  و إلطمع    باعدهم

طلبوا     سایسوا   للرجعه و  إیدخلون

إلوسفه  ما   تفید   إلطامع    إلمجنون

إلفضل موجود   عند  أهلک   تواسیهه

إلنّاس   إلساعدت    لازم     تمر  بیهه

لا تنسه     جمیله     إلجاک    متعنّی

إبماله و   إبحلاله   إبزوده   متهنّی

لذّه   إلبلعطاء  ما  تنوصف هیهات

خصوصاً لو تساعد کل فقیر إلشات

تحس فرحان و إتنشّع فرح بإلبیت

بس لتگول أنا  بالک  تدور إلصیت

إدفنه إبگاع   حرّی    سرّک إلحنّان

لا یفتهم  واحد   ساعدیت   إفلان

خل بس  أللّه شاهد یشهد أفعالک

و إذا تعطی إبمضیفک تکثر إدلالک

جاسم ثعلبی ألحسّانی 17/09/1400